سرینگر:___ غیرقانونی طورپر بھارت کے زیر قبضہ جموں و کشمیر میں پیپلز ڈیموکریٹک پارٹی کی صدر اور سابق وزیر اعلی محبوبہ مفتی نے ضلع بانڈی پورہ میں ایک کمسن بچی کے ساتھ دست درازی اوراسے اغوا کرنے کی کوشش کرنے والے بھارتی فوجیوں کوسخت ترین سزادینے کا مطالبہ کیا ہے۔کشمیرمیڈیاسروس کے مطابق محبوبہ مفتی نے ایک ٹویٹ میں واقعے کی غیر جانبدارانہ تحقیقات کا مطالبہ کرتے ہوئے کہا کہ بانڈی پورہ میں مقامی لوگوں نے کہا ہے کہ بھارتی فوجیوں نے ایک 9 سالہ بچی کو اغوا کرکے اس کی بے حرمتی کی کوشش کی ہے۔انہوں نے کہا کہ مذکورہ بچی کے اہلخانہ پر اب ایف آئی آر واپس لینے کے لئے دبا ڈالا جارہا ہے اور یہ انصاف کا مذاق اڑانے کے مترادف ہے۔ دریں اثنا ایس ایس پی بانڈی پورہ راہل ملک نے سرینگر میں ٹیلیفون پر صحافیوں کو بتایا کہ اس سلسلے میں ایف آئی آر پہلے ہی درج کی جاچکی ہے اور تحقیقات کا آغاز کردیا گیا ہے۔
